Radio Kiskeya

Akademi Kreyòl Ayisyen : yon zouti pou nou vanse ak lang nou ki se nanm nou !

Radio Kiskeya — 2013-04-29T17:08:56Z

UNIVERSITE D'ETAT D'HAITI RECTORAT

K O M I N I K E

Inivèsite Leta d Ayiti / Komite pou tabli Akademi Kreyòl Ayisyen an Mèkredi 24 avril 2013

Rektora Inivèsite Leta d Ayiti ak Komite pou tabli Akademi Kreyòl Ayisyen an kontan anpil wè Lwa sou fonksyònman ak òganizasyon Akademi kreyòl Ayisyen vote nan Chanm Depite a nan seyans madi 23 avril 2013 la. Komite a pran plezi pou anonse popilasyon an gwo nouvèl sa a : Akademi kreyòl Ayisyen an jwenn benediksyon li nan tou de (2) Chanm yo jan Konstitisyon peyi a mande sa nan atik 213 li.

Chapo ba pou palmantè yo nan Sena Repiblik la ak nan Chanm Depite a ! Vòt sa a konsakre viktwa Akademi Kreyòl la, se yon gwo bourad li jwenn pou li vanse sou chimen li, se yon tit legal li jwenn ki pou pèmèt li fonksyone kòmsadwa.

Komite pou tabli Akademi Kreyòl Ayisyen an remèsye tout Senatè yo, prensipalman Senatè Jean William JEANTY ak Senatè Dieuseul Simon DESRAS ki te pote pwojè lwa a sou do yo. Nou remèsye tout Depite yo prensiplman Prezidan chanm nan, Onorab Jean Tolbert ALEXIS, Komisyon Kilti ak touris Chanm nan, espesyalman Prezidan komisyon an Depite Kenston Jean-Baptiste ak Sekretè komisyon an, Depite Belange Jean-Baptiste, nou remèsye Depite Guerda Benjamen, Depite Lamarre Baptiste ak tout biwo Chanm nan ki kanpe djanm ak komite a.

Komite pou tabli Akademi Kreyòl Ayisyen an ap kontinye travay pou ede lang kreyòl la jwenn plas li merite nan sosyete a, pou ede garanti dwa lengwistik popilasyon an ki dwe fyè de lang li pale. Komite a pwofite mande gouvènman an pou li pran an konsiderasyon gwo avanse sa a ki fèt pou pwomosyon lang kreyòl la, pou li pibliye Lwa sou Akademi an epi pran tout dispozisyon pou Akademi jwenn mwayen pou li travay san pèdi tan.

Akademi Kreyòl Ayisyen : yon zouti pou nou vanse ak lang nou ki se nanm nou ! Pou komite a :

………………….. ……………………… ………………….. Fritz DESHOMMES Rogeda Dorcé DORCIL Sony ESTEUS Vis Rektè Rechèch Dwayen Fakilte Sosyete Animasyon Inivèsite Leta d Ayiti Lengwistik Aplike Kominikasyon Sosyal

………………………………. ……………………………… ……………………….. Pastè Pauris JEAN BAPTISTE Rev.Jean Pierre Nzemba Wayi DoktèYves Dejean Sektè pwotestan Direktè Jounal Sosyete sivil Lengwis Bon Nouvèl Lengwis

21, rue Rivière, B.P. 2279, Port-au-Prince, Haïti. – Tél. : (509) 2244-0151 ; 2244-0153 ; 2244-0156 ; 2244-0159 E-mail : recteur@ueh.edu.ht

Rezolisyon 7 Avril:Nou mande tout fòs òganize ak tout sitwayen ki pa rekonèt yo nan rejim Mateli-lamòt la kap dechèpiye peyi a mobilize pou kore demach opozisyon demokratik la kap travay pou ofri yon altènativ kap pote yon lavi miyò.

Radio Kiskeya — 2013-04-08T16:24:58Z

Mouvement Patriotique de L'Oppostion Democratique

Rezolisyon 7 Avril

Nou Menm Pati ak Regwoupman Pati Politik, Oganizasyon Popilè , òganozasyon sosyete sivil, òganizasyon teritoryal ak pèsonalite ki soti tout kote nan peyi an ; nan sousi konstriksyon tèt ansanm nou òganize plizyè rankont :
Okap, nou pibliye manifès Okap 17 oktòb 2012, se te yon radyografi rejim mateli/Lamòt la, sitirasyon peyi-a ak angajman pou'n akonpaye popilasyon an nan revandikasyon epi pou'n estriktire'n nan yon opozisyon efikas
Akayè nou te kontinye diskisyon pou mouvman tèt ansanm nan pran fòm nan peyi a, men pouvwa kaletèt la te kraze rankont la
Leyogàn tètansanm lan pran fòm, nou antann nou sou baz yon rezolisyon poun monte estrikti ki pou òganize aktivite mouvman patriyotik opozisyon aysyen ki pote non « Komite Pilotaj ». Jefò komite sa pèmet jodi dimanch 7 avril la nou reyini nan Gonayiv, Nou kontate : 1- Grangou, chomaj, ensekirite, lavichè ak revokasyon pa pil e pa pakèt, kontinye ap brase bil peyi a. 2- Aysyen pa gen dwa travay nan peyi a, tout gwo kontra enfrastrikti nan men etranje, sa montre klèman gouvèlman Mateli-Lamòt pa gen anyen pou wè ak pèp aysyen an. Poutèt sa nou denonse jan Mateli-Lamòt mare sosis li ak etranje pou dechèpiye richès peyi a.

Nou tout delege ki reyini nan rankont Gonayiv sa-a, nou diskite sou 3 tèm sa yo : 1- Rekonkèt dwa grandèt majè peyi an 2- Move pratik nan jan yap Mennen bak peyi a. 3- Eleksyon Apre anpil diskisyon ; delege, dirijan, reprezantan Pati ak Regwoupman Pati Politik, Oganizasyon Popilè , òganozasyon sosyete sivil, òganizasyon teritoryal ak pèsonalite, di :
Fòk nou fòse rejim Mateli-Lamòt la kite pouvwa-a
Batay pou bon jan eleksyon ak tèt ansanm opozisyon demokratik la nan eleksyon se mwayen nou chwazi pou nou retire rejim Mateli-Lamot la. Nou pral nan eleksyon ansanm pou'n genyen e nap genyen
Si Mateli ak Lamòt fè koken nan eleksyon, nap mobilize peyi a pou'n kapote yo sou pouvwa-a.

Nou mande tout fòs òganize ak tout sitwayen ki pa rekonèt yo nan rejim Mateli-lamòt la kap dechèpiye peyi a mobilize pou kore demach opozisyon demokratik la kap travay pou ofri yon altènativ kap pote yon lavi miyò. Nou reyafime angajman nou pou'n akonpaye mas pèp la nan batay lejitim lap menen kont Gouvèlman Mateli-Lamòt la.

Mouvement Patriotique de L'Oppostion Democratique

Pozisyon òganizasyon Sektè Fanm lan sou fason Palman an fè chwa pou mete fanm nan Kolèj Tranzitwa Konsèy Elektoral Pèmanan an (KJT-KEP)

Radio Kiskeya — 2013-03-26T22:45:11Z

Pozisyon òganizasyon Sektè Fanm lan sou fason Palman an fè chwa pou mete fanm nan Kolèj Tranzitwa Konsèy Elektoral Pèmanan an (KJT-KEP)

KOMINIKE POU LAPRÈS

Regwoupman ak òganizasyon fanm ki te patisipe nan demach pou prezante dosye yon fanm bay Palman an pou vin jwe wòl konseyèz nan KTJ-KEP a, konstate ak anpil regrè kouman Palman an rate yon okazyon pou kore jèfò sitwayen ak sitwayèn epi enstitisyon ap fè pou ankouraje patisipasyon òganizasyon sosyete sivil yo, patikilyèman òganizasyon fanm yo. Nou sezi wè kouman Palman an vyole prensip li te tabli yo, lè se Vis Prezidan Sena a ak Prezidan Chanm Depite ki fè chwa pa yo, san konsantman Asanble Senatè ak Depite yo.

Regwoupman ak òganizasyon fanm yo, denonse ak tout fòs yo fason gwo ponyèt Vis Prezidan Sena a ak Prezidan Chanm Depite a chwazi fanm ki pou al nan KTJ-KEP la. Chwa 2 otorite sa yo abitrè. Fanm yo chwazi a pa soti nan okenn konsètasyon nan mitan òganizasyon fanm ki pi reprezantatif nan peyi a, jan Komisyon bikameral la te mande sa, nan lèt 9 mas 2013 la. Pi rèd, fanm sa a pa t menm gen okenn dosye ki depoze nan Palman an.

Regwoupman ak òganizasyon fanm yo konstate, yon fwa ankò, kouman Palman an kontinye ap diskredite tèt li, lè li montre li pa gen ankenn krentif pou mache sou pwòp prensip li tabli, alòske li ta sipoze yon enstitisyon referans. Li aksepte mannèv ki fèt pou eskive chwa plis pase 52 òganizasyon fanm ki rekoni pou batay yo depi plis pase 25 lane pou avansman ak respè Dwa fanm ; Mannèv ki fèt nan avantaj yon ansyen kòlèg ki jwenn apwi yon sèl grenn gwoup, moun pa janm tande aksyon li pou defann kòz fanm nan. Li fè kase fèy kouvri sa ak dappiyanp alatèt biwo 2 Chanm yo fè sou vòt asanble Senatè yo, kote 13 Senatè sou 15 te vote kandidat Sektè fanm nan te chwazi apre konsiltasyon laj. Zak gwo ponyèt sa a fè n konprann aklè, vrè rezon ki fè Prezidan Sena a te mandate, bridsoukou Vis Prezidan an pou negosye epi siyen nan non li. Li aksepte pou yo bay òganizasyon sosyete sivil la move kou, pou defann ti enterè pouvwa pèsonèl yo, e menm livre estrikti KTJ-KEP a bay Egzekitif la pou li fè e redefè.

Esperyans sa a montre nou, yon lòt fwa ankò, se pa enterè siperyè nasyon an ki enterese politisyen yo. Enterè pèsonèl yo ak enterè pati yo, fè yo pa janm ka anmezi respekte règ jwèt demokratik la. Li pèmèt nou wè aklè tout sektè ki kont patisipasyon kouch fondamantal sosyete a nan desizyon k ap pran pou peyi a. Nou pran nòt tou sou jan anbasad kouri bay api ak pozisyon ki vle pran distans ak patisipasyon yon sektè ki pa janm manke, depi toutan, lonje dwèt sou kadejak k ap fèt sou dwa sitwayen ak sitwayèn pou patisipe nan dirije peyi yo anchèmèt, chèmètrès.

Sektè fanm nan te enterese rantre nan batay sa a, nan lespri pou defann demokrasi nan peyi a, epi pou sèvi kòm je pou sosyete sivil la. Daprè analiz nou, blokaj nan monte aparèy elektoral la soti nan volonte Ekzekitif la pou li kontwole enstitisyon an. Konsa l ap pi fasil pou kontinye transfòme pwosesis elektoral la nan yon operasyon seleksyon, jan sa toujou fèt nan kad sistèm restavèk yo foure peyi a depi kèk tan . Regwoupman ak òganizasyon fanm yo ap kontinye kanpe djanm pou veye tout sektè ki sòti pou enpoze bay peyi a dirijan tèt chat nan detounen vòt pèp la. Nan sans sa a, nou mande tout sektè demokratik ak popilè rete vijilan, mobilize, epi denonse tout vye mannèv Egzekitif la ak tout konplis li yo ap fè pou òganize eleksyon bidon. N ap fè sonje, KTJ-KEP se yon enstitisyon dekonsantre ki sipoze gen biwo nan tout kolektivite yo. Tout òganizasyon dwe louvri je gade sa k ap fèt nan Seksyon kominal yo, Komin yo ak Depatman yo, pou veye epi asire prezans yo nan biwo elektoral yo. Nou dwe mobilize nan jwe wòl mandatè, obsèvatè pou yo sispann ban nou lalin pou fwomaj.

Nou rete kwè esperyans sa a soude òganizasyon fanm yo pi plis, paske sa ba nou okazyon ranfòse konsètasyon ak dyalòg, epi defini estrateji ansanm. N ap kapitalize sou esperyans sa a, pou n kontinye kreye pi bon kondisyon pou rapouswiv lit la, nan sans pou Politik fèt yon lòt jan nan peyi a. Patisipasyon fanm yo, kantite yo reprezante nan espas desizyon yo dwe mare ak ki lide, ki enterè k ap defann pou fanm yo ak pou rès peyi a . Pòtoprens, 21mas 2013 Pou otantifikasyon Marie Guyrleine Justin Rezo Fanm Radyo Kominotè Ayisyen- REFRAKA __________________ Lisa François Fanm Yo La ___________________ Yolette Andrée Jeanty Kay Fanm ___________________ Marie Frantz Joachim Solidarite Fanm Ayisyèn – SOFA ____________________ Pj. Lis òganizasyon ki kore chwa Sektè Fanm lan

Yon fanm alatèt Rezo Fwontalye Jano Siksè (RFJS)

Radio Kiskeya — 2013-03-14T15:09:47Z

Yon fanm alatèt Rezo Fwontalye Jano Siksè (RFJS)

Komite Dwa Moun ki manm Rezo Fwontalye Jano Siksè eli Manise Elie kòm nouvo Kòdonatris Nasyonal, pandan dènye Asanble Jeneral Nasyonal Rezo a, ki te reyalize nan Lilavwa, (Pòtoprens) soti 26 fevriye pou rive 1e mas 2013.

Manise Elie ki gen 29 lane, se ansyen sekretè Kòdinasyon Nasyonal RFJS e se premye fanm ki eli Kòdonatris depi kreasyon òganizasyon pwomosyon ak defans dwa moun sa a, nan dat 2 jiyè 2001.

Eleksyon ki mete Madan Elie nan tèt RFJS te pèmèt tou yo renouvle tout kòdinasyon nasyonal rezo a ki gen 9 manm ladan. Nouvo ekip sa a pral kowòdone pandan 2 lane manda li a, tout aksyon ak lavi Rezo Fwontalyè Jano Siksè sou bò Ayiti pou pèmèt li rapousuiv ak misyon li ki se fè pwomosyon ak defann dwa moun sou fwontyè Ayiti ak Repiblik Dominikèn.

28 fevriye 2013, detan li t ap pran lapawòl apre vòt la, , nouvo Kòdonatris Rezo Fwontalyè Jano Siksè, remèsye manm Komite Dwa Moun ki te prezan e ki soti nan divès depatman sou fwontyè a.

Li mande kolaborasyon djanm yo pou yo ka rive atenn objektif ki vize pou 2 lane manda kodinasyon an.

« Nou eli mwen kòm kòdonatris RFJS e mwen vle siyale nou, san kolaborasyon nou, nou pap ka rive atenn objektif nou. Lite pou respè dwa moun sou fwontyè a epi kontribye nan amonize relasyon ant 2 pèp vwazen nou yo, dwe rete pi gwo defi pou nou leve ». Se pawòl nouvo kòdonatris la.

Plizyè manm ansyen kòdinasyon an retounen nan kad eleksyon sa yo, ladan yo, dènye kòdonatè RFJS la, Alexis Alphonse ki vini sekretè nouvo kòdinasyon an.

Fok nou fè remake tou, prezans 4 fanm sou 9 manm ki genyen nan nouvo kodinasyon an. Ranfòse patisipasyon ak lidèchip fanm yo nan mitan Rezo Fwontalye Jano Siksè, rete yon priyorite pou òganizasyon k ap apiye Rezo a. Nouvo responsab RFJS la di, li konsyan wotè defi sa a e li vle travay pou li leve l pandan tout manda 2 lane li a.

Uit (8) lòt manm ki konpoze Kòdinasyon Nasyonal RFJS la se : Alexis Alphonse (Nodès), Sekretè ; Marie Lourdes Louis Jacques, (Ba Plato Santral), Trezoryè ; Georges Joseph ak Bel Philius (Sidès ak Nòdès), Pòtpawol ; Desravines Jasmin, (Nodes), Delege ; Judith Pierre, (Lwès), Delege ; Elise Micanor ak Arnold Pen Joseph (Nodes ak Wo Plato Santral) , Konseye.

Reprezantan-ant GARR ak oganizasyon Solidarite Fwontalyè ki baze nan Wanament, te asiste eleksyon sa yo.

Rezo Fwontalyè Jano Siksè fòme ak komite dwa moun ki tabli sou 2 bò fwontyè a e ki gen alatèt yo, yon Kòdinasyon Nasyonal an Ayiti ak nan Repiblik Dominikèn.

Depi li kreye nan lane 2001, Rezo a benefisye akonpayman òganizasyon ayisyen ak dominiken tankou GARR ak Sevis Jezuit pou Refijye ak Migran. Nan lane 2010, apre tranblemann tè a, Inyon Ewopeyèn, nan tèt kole ak Christian Aid, koumanse finanse yon pwojè ki touche Rezo a e ki rele : « Sou wout yon kilti dwa moun ak yon viv ansanm sou fwontyè Ayiti ak Repiblik Dominikèn ».

N ap fè remake, Kòdonatè binasyonal Pwojè sa a, José Koechlin Costa ki tabli an Repiblik Dominikèn te reponn prezan tou nan eleksyon ki te fèt nan kad Asanble Jeneral nasyonal Rezo Fwontalye Jano Siksè nan Pòtoprens

Premye minis Laurent Lamothe prezante yon bilan pozitif de prezans li nan somè ekonomik Davos la

Radio Kiskeya — 2013-01-31T18:11:20Z

Premye minis Laurent Salvador Lamothe deklare gouvèlman an gen volonte poul fè eleksyon nan fen ane 2013 la.Li eksplike tou gen yon komite miks ki deja tabli ak kominote entènasyonal la pou etidye ki mekanism kap mete an plas pou finisman operasyon yo ak garanti sekirite eleksyon yo

.Chèf gouvèlman an fè konnen sèl sa ki rete pou fèt, se pwosesis pou mete kanpe Konsèy elektoral la. Premye minis la fè deklarasyon sa a apre LONI fin mande pou eleksyon yo fèt nan finisman ane a Premye minis Laurent Salvador Lamothe drese yon bilan pozitif de patisipasyon l nan 4twazyèm somè ekonomik mondyal la ki sot fèt nan vil Davos, nan peyi La Suisse, soti 22 pou rive 26 janvye 2013 la. Chèf gouvèlman an pale de plizyè rankont li te genyen ak plizyè gwo envestisè, tankou : gran finansye entènasyonal Georges Soros ; dirjan antrepriz COCA Cola, Digicel ak lòt ankò.Li anonse plizyè pwojè pèsonalite sa yo ap vin ede egzekite an Ayiti.

Li te pale konsa mèkredi maten an nan primati a, apre li te fin remèt òganizatè « Kita Nago » yo yon plak Onè ak Merit.Premye minis Laurent Salvador Lamothe remèt Harry Nicolas ak tout ekip “Kita Nago” a jounen mèkredi a nan Primati a, yon plak Onè ak Merit. Chèf gouvèlman an deklare jès sa a se pou bat bravo pou kouraj ak detèminasyon ekip sila a ak pou pwojè inite nasyonal sa a “Kita Nago” reprezante.

Sou bò pal senatè Francisco De La Cruz deklare gouvèlman Martelly/Lamothe la pa montre ankenn volonte pou òganize eleksyon nan peyi a. Palmantè Plato Santral la estime metòd ekip Tèt Kale a ap itilize yo depaman ak ranfòsman eta de dwa. Dapre senatè De La Cruz, yon gouvènman ki vle atire envestisman gen pou devwa bay yon lòt imaj. Toujou nan Palman an premye sekretè Chanm Depite a, Gluck Théophile, anonse yo chwazi 9 depite pou entegre komisyon bikameral kap gen pou deziye 3 reprezantan palman an nan Kolèj tranzitwa Konsèy elektoral pèmanan an.Pami depite yo, gen Ogline Pierre ki reprezante biwo a, Benoit Laguerre (PSP) ak Jean Danton Léger (endepandan).Dapre depite Théophile, blòk minoritè a refize patisipe nan komisyon an pou rezon pa yo.

Yon lòt pa ajan ekzekitif enterimè ki nan tèt Meri Petyonvil la, Yvanka Jolicoeur Brutus, di li pap bay machann yo yon souf nan operasyon li lanse pou debarase lari komin sila a. Madan Brutus fè konnen gen plizyè brigad ak ajan polis ki mobilize pou leve machann yo e menm al mennen yo nan mache ki prepare pou yo.Yvanka Jolicoeur Brutus pale konsa maten mèkredi a.

Plizyè machann nou te rankontre nan Petyonvil deklare yo rekonèt li pa bon pou yo rete nan lari a. Yo menm dakò pou yo ta ale yon lòt kote. Men, dapre yo, mache alatèt meri a di li mete a dispozisyon yo a oubyen yo pa gen plas, oubyen lòt machann ki deja la bat chalbari dèyè yo lè yo ale nan mache sa yo.

Poun fini minis kilti a, Josette Darguste, siyen yon pwotokòl akò ak responsab Ecole Nationale de l'Humour Ville Québec (Montréal, Canada) ki vize mete kanpe nan Pòtoprens yon lekòl humour ak entèprèt. Nan kad pwojè a, dwe gen echanj kiltirèl, fòmasyon ak pwodiksyon spektak sou teren an.Dapre Minis kilti a, inisyativ sa a antre nan kad politik gouvènman Martelly/Lamothe la pou kreye nan peyi a enstitisyon ki kapab amelyore imaj peyi a atravè lemond.

Ekriven ayisyen Dany Laferrière asosye ak demach sa a kap chache ankouraje jèn talan nan peyi a. Ekriven an antre Pòtoprens nan kad siyati pwotokòl akò a ak Ministè Kilti. Dapre Dany Laferrière ak direktris pedagojik Lekòl nasyonal humour vil Québec la, pwojè a ap pèmèt yo ofri spektak ki gen nen nan figi yo bay touris kap chache bon anbyans.redac/rtk/30-1-2013

Ayiti : Gwoup Medyaltènatif (GM) kore mouvman k ap fèt pou radyo kominotè Vwa Klodi Mizo relouvri kòmsadwa

Radio Kiskeya — 2012-11-29T18:34:44Z

Ayiti pa dwe pèdi gany dwa kominikasyon yo

Ayiti : Gwoup Medyaltènatif (GM) kore mouvman k ap fèt pou radyo kominotè Vwa Klodi Mizo relouvri kòmsadwa

Gwoup Medyaltènatif (GM) pote solidarite l bay ekip radyo kominotè Vwa Klodi Mizo (VKM) Okay, konsèy nasyonal telekominikasyon (Konatel) deside fèmen depi vandredi 9 novanm 2012.

Menm jan radyo kominotè nan peyi a, ki sot di, nan dat 28 novanm 2012,kouman yo pa dakò ak desizyon Konatel la, Gwoup Medyaltènatif leve lavwa kont zak gwo ponyèt 9 novanm nan, ki vin pilonnen libète laprès, libète lapawòl ak dwa kominikasyon an an jeneral.

Gwoup Medyaltènatif, se yon asosyasyon k ap fè pwomosyon ak defann dwa kominikasyon an. Li pa dakò ak desizyon politik pou fèmen yon radyo kominotè, ki tabli depi 1886 nan objektif rann kominote lokal yo sèvis epi pou pèmèt yo fè tande vwa yo san baboukèt.

Depi apeprè 20 lane, radyo kominotè yo pèmèt anpil moun, yo konn abitye mete sou kote epi ki rete byen lwen sant desizyon yo, rive jwenn repons nesesè sou bezwen enfòmasyon ak kominikasyon pa yo.

Depi dat sa a, radyo kominotè yo gen yon rekonesans sosyal, okenn otorite pa an dwa neglije.

Se san rete, anpil enstitisyon ap itilize sèvis radyo kominotè yo pou pala ak kominote lokal yo, tankou òganis Leta, ajans kowoperasyon, òganizasyoin nasyonal ak entènasyonal ki pa sou lobedyans gouvènman, asosyasyon, elatriye.

Dispozisyon lalwa, nou pa genyen kounye a sou radyo kominotè yo, pa kab sèvi kòm pretès pou yo privatize radyo yo. Sa pa dwe sèvi kòm pretès pou vin blayi zak gwoponyèt ; pou vin eseye retire moso nan libète lapawòl.

Libète lapawòl, se yon gany batay popilè anfavè demokrasi n ap fè depi lane 1980 yo.

Mouvman radyo kominotè- yo koumanse pran chè nan peyi a depi lane 1994, nan kad goumen pou demokrasi ak devlopman. Se nan kontèks sa a, Leta te met tèt ansanm ak fon nasyon zini pou edikasyon lasyans ak lakilti (Unesco) pou mete kanpe 4 radyo kominotè nan peyi a.

Gwoup Medyaltènatif denonse tantativ otorite me 2011 yo pou retounen ak vye pratik tan lontan yo, nan chèche retire, nan men kominote yo, bon jan zouti ki kab fè kominote yo ak sosyete a an jeral, vanse pou pi devan.

Reny jodia, se reny sosyete enfòmasyon ak konesans. Sa mande pou tout Leta, ki anfavè demokrasi ak pwogrè, pran lòt direksyon. Nan sans sa a, tout moun ta an dwa espere bon jan dispozisyon Leta, ki pèmèt radyo kominotè yo layite san pwoblèm, ni baboukèt. Nan sans sa a, tou, radyo kominotè a kapab sèvi kòm platfòm teknoloji nan lokalite yo.

Gwoup Medyaltènatif estomake devan atitid depaman Konatal la, k al fèmen radyo kominotè Vwa Klodi Mizo nan yon kontèks ki chaje ak pawòl piman bouk, pafwa yo di yo anba anba, pafwa se ak awogans, san okenn respè pou moun ak medya yo, pawol piman bouk sa yo ap soti nan bouch otorite yo kont medya ak kont jounalis yo.

Gwoup Medyaltènatif ap mande manm radyo kominotè yo kontinye mobilize pou fè respekte dwa yo. Gwoup Medyaltènatif swete radyo kominotè yo jwenn solidarite tout medya k ap feraye nan peyi a.

Gwoup Medyaltènatif ap envite Konatel tounen sou desizyon li te pran kont radyo kominotè Vwa Klodi Mizo, yon desizyon politik, ki depaman san gade dèyè ak demokrasi.

Pòtoprens, 29 novanm 2012

Pou Konsèj Gesyon,

Gotson Pierre

Kòdonatè

Eske Leta ayisyen ka rezoud pwoblèm latè nan peyi a san sektè peyizan an ?

Radio Kiskeya — 2012-09-25T17:44:34Z

Je nan Je N ap batay pou tè nan bon kondisyon ak bon jan kay

Nòt pou laprès

Eske Leta ayisyen ka rezoud pwoblèm latè nan peyi a san sektè peyizan an ? Se kesyon sa 11 òganizasyon ki nan platfòm “JE NAN JE”*, k ap goumen pou DWA LATÈ AK DWA POU BONJAN LOJMAN respekte nan peyi a ap poze tèt li. Platfòm nan gen gwo kè sote paske li wè anpil pwojè k ap fèt nan kad rekonstriksyon peyi a pa nan enterè moun ki pi pòv yo ni enterè peyi a vre. “JE NAN JE” ap atire atansyon sosyete a sou yonn nan pwojè sa yo :

Gen yon reyinyon ki fèt nan Otèl Karibe, nan Pòtoprens, nan dat 7 septanm 2012 la sou koze sekirite nan zafè posede tè. Dapre sa ki soti nan laprès, plis pase 200 moun ki gen pou wè ak zafè latè ak amenajman teritwa tankou : apantè, notè, avoka, kad nan enstitisyon Leta, manm sosyete sivil ak sektè prive, te patisipe nan reyinyon sa « Comité Interministériel pour l'Aménagement du Territoire » (CIAT), ki anba kontwòl Primati, t ap dirije.

Malerezman, nou konstate sektè peyizan an, ki plis gen arevwa ak reyalite tè nan peyi a pa t envite nan rankont sa. Nan diskou dirijan yo te fè pou louvri rankont sa, se sitou enterè endistriyèl la, envestisè a, mèt tè ki pèdi yo akòz bidonvil, nou santi pwojè refòm fonsye yo anonse a pral defann. Se yon bagay ki bay gwo kè sote lè nou konnen ki rapò dirèk peyizan yo genyen ak latè, nan koze pwodui manje pou peyi a, epi nan relasyon li ak apantè, ak notè. Lè fini, se peyizan yo ki premye viktim feblès sistèm Etasivil ayisyen an, sitou nan koze papye pou idantifye yo kòm mèt tè.

Lè JE NAN JE wè se pa ni pou ni ak gwoup ki pi konsène epi viktim nan koze latè a Leta ap chèche solisyon, platfòm nan ap mande èske pwojè refòm fonsyè sa a se pa yon pwojè pou pèmèt gwo zouzoun ak miltinasyonal yo fè dappiyanp sou plis tè peyi a toujou nan lide pou mete plis zòn franch endistriyèl sou tè ki la pou pwodui manje yo oswa pou mete kanpe gwo pwojè touristik ki pa nan enterè peyi a vre ?

JE NAN JE ap mande tou, eske se pa yon pwojè pou pèmèt gwo zouzoun ak miltinasyonal yo fè dappiyanp sou resous natirèl nou yo tankou lò, mab blan, elatriye… ?

JE NAN JE mande CIAT pou li rebat kat la. Pwoblèm amenajman teritwa pa kapab rezoud tout bon vre san patisipasyon sektè peyizan an ki chaje òganizasyon ki kapab reprezante l kòmsadwa nan tout deba k ap fèt sou zafè LATÈ. Ayiti pa kapab fè okenn pwogrè reyèl san agrikilti peyizan an ki se yon agrikilti ekolojik. Se yon refòm agrè entegral agrikilti peyi a bezwen pou l ka rive bay pitit li yo manje.

Okenn pwoblèm peyi a pa kapab jwenn solisyon san enplikasyon sektè peyizan an, san enplikasyon tout òganizasyon nan Mouvman sosyal ayisyen an. Peyizan an pa deside rete ANDEYÒ ZAFÈ PEYI A ANKÒ !

Pou JE NAN JE : Chavannes Jean-Baptiste, Kòdonatè.

Gen yon komisyon ki la pou estabilize pri ki kreye vandredi 14 septanm nan

Radio Kiskeya — 2012-09-15T17:07:35Z

Men yon anons gouvenman fè sou koze lavichè ya

NOT POU LAPRÈS

Kreyasyon komisyon pou estabilize pri yo

Pòtoprens, vandredi 14 Septanm 2012 : Biwo kominikasyon Primati a ap fè konnen ke gen yon komisyon ki la pou estabilize pri ki kreye jodi vandredi 14septanm nan. Komisyon sila gen ladann Ministè Komès, Ministè Agrikilti, Konsèydevlopman ekonomik ak sosyal ak Kòdinasyon nasyonal pou sekirite alimantè.

Komisyon an gen pou manda pwopoze mezi pou estabilizepri danre yo konsidere ki pi sansib yo akoz enpòtans yo genyen nan chak fanmiy.

Gouvènman Repiblik la fè konnen yon lòt fwa volonte lipou batay kont lavi chè etan lap pran bon jan dispozisyon rapid ak efikas. Lipwofite okazyon an pou l envite tout aktè konsène yo (enpòtatè, gwosis akdetayan) rete tèt frèt devan move bri kap kouri. Mache ayisyen an pa genpwoblèm machandiz epitou pri sou mache entènasyonal la rete estab.

Komisyon an angaje l pou l travay men nan men ak aktèkonsène yo (sektè prive ak asosiyasyon peyizan) pou pran bon jan mezi pou priyo ka rete estab.

FEN-

Bureau de Communication de la Primature

Contact : Bureau de Communication

Téléphone : +509 22 21 00 07 / +509 22 21 00 53

Email : communications@primature.ht

FRAKKA mande :Jij enstriksyon Berge O. Surpris libere Oxigène David ak Charles Dukens ki pa fè okenn krim pou y ap manje prizon.

Radio Kiskeya — 2012-09-03T16:52:33Z

n sou Koze Kay Telefòn:22270754, 38228829 Email:frakkayiti@yahoo.fr

Rele aba grangou, aba lavichè se yon krim sou gouvènman Mateli Lamòt la

Madi 19 jen 2012 la, lapolis arete Oxigène David ak Charles Dukens pandan yo t ap manifeste nan yon sitign « Mouvement de Liberté d'Egalite des Haïtiens pour la Fraternité » MOLEGHAF te òganize devan Ministè Afè Sosyal. Se chak madi manm MOLEGHAF òganize sitign sa a devan Ministè a pou rele « aba grangou ak lavichè epi mande gouvènman an travay ».

Militan MOLEGHAF yo deja genyen 2 mwa 2 jou nan prizon Penitansye Nasyonal san jije. Yo te parèt devan jij enstriksyon Berge O. Surpris nan pakè Pòtoprens 18 jiyè 2012 la. Akizasyon lapolis lage sou do mesye yo se (ak vandalis) paske yo kraze vit yon machin ki te kanpe nan zòn lan. Alòske swadizan mèt machin lan pa t janm parèt nan tribinal la. Jij Berge O. Surpris retounen mesye yo nan penitansye. Ki donk, sèl krim 2 militan MOLEGHAF yo komèt, se paske yo t ap rele « aba grangou ak lavichè, yo bezwen travay ».

Oxigène David abite Fònasyonal yon katye popilè, se papa 5 pitit, 4 fi 1 gason. Se manm fondatè epi prensipal lidè MOLEGHAF, yon òganizasyon revandikatif ki rasanble jenn gason ak jenn fanm nan zòn lan. Depi sou gouvènman Rene Preval, òganizasyon sa a toujou òganize sitign chak madi devan Ministè Afè Sosyal pou mande travay. Yon revandikasyon lejitim nan yon peyi ak yon popilasyon 60 pousan jèn ak yon to chomaj anviwon 70 pousan, kote lavichè a ap grenpe pi plis chak jou.

Charles Dukens, yon jenn militan 23 lane, ki apèn fin fè klas filo. Dukens ap milite nan MOLEGHAF depi anviwon 1 lane edmi. Dukens se youn nan 8 pitit madan Anile Charles, ki pap viv avèk mari l depi 12 lane. Madanm lan ap kriye tout jounen tout lanuit pou pitit gason l k ap manje prizon paske li te pèmèt li rele aba grangou sou gouvènman Mateli Lamòt la.

Arestasyon Oxigène David ak Charles Dukens, se yon zak politik pou fèmen bouch militan MOLEGHAF yo k ap rele aba grangou, ba yo travay. Alòske madan prezidan an gen yon pwogram ki rele (aba grangou). Pandan nou ka konstate grangou ak lamizè ap touye moun nan peyi a . Arestasyon ak anprizònman 2 jenn gason sa yo ki pa komèt okenn zak malonèt, ki senpleman t ap defann dwa yo, fè nou poze tèt nou kesyon pou mande ki kantite inosan k ap manje prizon san yo pa fè anyen ? Alòske, bandi legal yo gen pouvwa pou yo fè sa yo vle ak peyi a.

Nou menmm nan FRAKKA, nou denonse aretasyon 2 jenn gason sa yo k ap boule prizon depi anviwon 2 mwa paske sèlman yo t ap mande travay ak manje. Se yon aretasyon abitrè, ilegal, ki vyole dwa konstitisyon 1987 la bay tout moun pou manifeste kòlè yo kont tout sa yo pa dakò k ap fèt nan sosyete a. Nou pwofite lanse yon apèl bay tout fòs pwogresis yo, pou nou leve kanpe kont retou rejim gwo ponyèt makout k ap rechouke nan peyi a.

Konsa nou menm nan FRAKKA, nou mande :
Jij enstriksyon Berge O. Surpris libere Oxigène David ak Charles Dukens ki pa fè okenn krim pou y ap manje prizon.
Enstitisyon k ap defann dwa moun yo pou pran pozisyon sou arestasyon gwo ponyèt ak anprizònman abitrè Oxigène David ak Charles Dukens.
Pou sektè popilè a leve kanpe kont retou rejim boutdi makout ladwat ak lekstrèm dwat la vle rechouke nan peyi a.

Aba grangou ak lavichè ! Viv liberasyon Oxigène David ak Charles Dukens

Pou Biwo Egzekitif FRAKKA : ________________ SANON Reyneld Sekretè Egzekitif Koze Kay Telefòn:22270754, 38228829 Email:frakkayiti@yahoo.fr

28 jiyè 2012 sa a fè egzakteman 97 lane depi militè meriken te okipe peyi a yon premye fwa ak Komemorasyon anivèsè Simon Bolivar yón komite fòme nan okap pou tabli bonjan solidarite ak pep venezelyen an

Radio Kiskeya — 2012-07-29T15:04:49Z

ENVAZYON ETAZINI NAN MONN LA

[ Refleksyon sa a, se Rezo solidarite ak Batay Ouvriye nan Nouyòk ki fè nou jwenn li. Yo fè l nan kad komemorasyon 28 jiyè 1915 la kote ane sa a yo pral mobilize nan vant tig la ansanm ak yon lòt òganizasyon entènasyonal yo rele “One Struggle – Yon sèl lit” pou pwoteste kòmsadwa.Tèks orijinal la ki ann angle prezante nan anèks la sou fòm afich. ]

Depi koumansman 20èm syèk lan, san konte envazyon an sekrè, te gen plis pase 120 agresyon militè meriken. An mwayèn, li fè plis pase yon agresyon militè chak ane. Ann Amerik Santral ak nan Karayib sèlman, fòs lame meriken yon entèvni : 6 fwa Kiba, 4 fwa an Repiblik Dominkèn, 2 fwa El Salvador, yon fwa an Grenad, 3 fwa Gwatemala, 4 fwa an Ayiti, 7 fwa Ondiras, 3 fwa o Meksik, 6 fwa Nikaragwa, 8 fwa Panama, e 2 fwa Pòtoriko. Gen plis pase 865 baz miltè nan 63 peyi etranje. An 2011, depans militè Etazini te fè 20% nan bidjè federal la, swa $718 bilyon (milya) dola. Sa reprezante 41% nan bidjè miltè tout peyi sou latè met ansanm. Fòs lamarin militè Etazini pi gwo pase 13 pi gwo fòs marin lòt peyi met ansanm, e 11 nan peyi sa yo se alye militè Etazini. Etazini dispoze 5,113 bonm nikleyè. Sa kont pou ekstèmine tout moun k ap viv sou planèt lan plizyè fwa. Ane sa a, fòs militè meriken yo angaje dirèkteman nan omwen 6 peyi : Irak, Afganistan, Pakistan, Yemen, Somali ak Kongo.

Estatisktik sa yo kont pou bay moun tèt fè mal. Men se twòkèt lan. Fos lanmò sa yo reprezante sa moun konn rele « kanson fè ki kache dèye men envizib Mache Lib lan ». Fòs militè meriken yo se bra an fè pou garanti mizannaplikasyon politik ekonomik enpeyalis yo. Politik ekonomik sa yo, se ansanm politik pou « ankouraje envestisman » kote yo sèvi ak dèt peyi domine yo ki fin fè pil sou pil ansanm ak yon seri « kriz ekonomik » yo manniganse pou fòse politik remèd chwal FMI sa yo sou do travayè atravè lemonn, tankou sa ki ap pase jounen jodi a an Grès. Politik neoliberal sa yo enkli privatizasyon sèvis leta yo, plan osterite mare senti, rediksyon salè ak ogmantasyon lavichè, rediksyon pansyon, rediksyon nan ledikasyon, rediksyon nan lasante, rediksyon nan sèvis sosyal yo, kraze sendika, mete zòn franch, trete « mache lib » yo negosye pou louvri vant peyi domine yo… tout sa swadizan pou balanse bidjè leta yo. Jounen jodi a, enpeyalis yo sèvi ak dèt yo kofre sou leta domine yo pou yo rive akonpli sa yo te konn bezwen fè ak envazyon nan syèk presedan yo. Epi tout politik sa yo ap benefisye klima laperèz yo fin tabli ak yon swadizan « Gè mondyal kont teworis » kote moun ki pa dakò ak pwogram sa a vin tounen « teworis » yo ka eliminen (menm jan manifestan Gwasimal yo te jwenn etikèt « teworis »). Tout sa, pandan rich yo ap jwen egzanpsyon fiskal, konpayi finansye mondyal yo jwenn plan sovtaj (sètadi yo jwenn lajan gratis nan men Leta, ki vle di lajan kontribyab yo, sètadi lajan pèp la !), gwo konpayi miltinasyonal yo jwenn paradi fiskal aletranje, epi PDG gwo konapyi sa yo jwenn salè ak boni konbyen milyon dola par an.

Rezilta tout ansanm politik sa yo se lamizè jeneralize pou travayè atravè tout peyi domine yo (sa yo konn rele « peyi tyè monn » yo). Jounen jodi a, politik sa yo ap sible travayè yo nan peyi endistriyalize yo tou, atravè tout Lewòp epi Ozetazini tou. Finalman, pandan pwoblèm chanjman katastowfik yo nan anviwonman yo ap fè kolizyon ak kriz finansye mondyal yo epi monte rezistans popilè yo mondyalman, siveyans, represyon ak laterè Leta ap vin sible ouvriye ak travayè yo plizanpli atravè lemonn.

Kolektif Mobilizasyon pou Dedomaje Viktim Kolera yo

28 jiyè 2012 sa a fè egzakteman 97 lane depi militè meriken te okipe peyi a yon premye fwa. Jodi a ankò, nou anba yon okipasyon etranje k ap fèt anba kouvèti Nasyonzini. Menm jan yo te piye richès nou yo pandan premye okipasyon an, se konsa jodi a yo kontinye ap piye richès nou yo. Anplis sa, fòs okipasyon an (MINISTA) fè kadejak sou pitit pèp la epi touye plis pase 7 mil moun nan kolera epi voye plis pase 500 mil lòt al kouche sou kabann lopital.

Samdi 28 jiyè, 9vè tapan, n ap rasanble sou Fò Nasyonal pou n al bout devan Fakilte Syanzimèn pou n al di MINISTA non, li pa gen dwa pile lakou Fakilte a. Nou pral kouri dèyè MINISTA Kolera kadejakè, nou pral kouri dèyè grangou wòz la ak arestasyon tèt kale k ap fèt kont pitit pèp la.

Viv yon AYITI granmoun ! Aba MINISTA KOLERA !

Komemorasyon Anivèsè nesans Simon Bolivar – Solidarite Haiti Venezyela

Jodiya 24 jwiyè se dat nesans yon potorik gason, yon nonm ki te wè lwen non sèlman pou peyi kote l te fèt men pou tout pèp ki t ap lite nan rejyon amerik yo pou sòti anba bòt kolon espayòl. N ap pale de Simon Bolivar. Bolivar le libérateur te fèt 25 jwiye 1783. Rèv li ak angajman l pou libere tout rejyon te mennen l ann Ayiti nan lane 1815. Li te vini chèche èd. Prezidan Petion te byen akeyi l, prezidan tande l e li konprann rèv Bolivar. Bolivar frape, prezidan Petion reponn e se konsa li bay Bolivar tout kalite èd ke leta ayisyen te kapab bay yon dirijan mouvman revolisyonè.

Sa pral pèmèt Bolivar fè yon ti pa an avan nan lit pou libere rejyon anba grif kolon espanyòl. Pi gwo pa vini fèt aprè. Simon Bolivar retire Lamérik di Sid anba grif kolon panyòl e li respekte angajman li anfas Alexandre Pétion lè li proklame liberasyon tout esklav nan tout zòn Gran Kolonbi a.

Nou remake ke apre prèske 200 zan pèp venezelyen an kenbe nan memwa li jès solidarite sa a ke pèp ayisyen an te fè a. Nan traka nap travèse jodia yo, kote nap chèchè nan diyite ak souverènte retire peyi nou nan malsite, pèp venezyelyen ansanm ak otorite peyi Venezyela deside lonje men ban nou nan reyèl solidarite men nan men ak respè, san chantaj. Popilasyon nan Nò kapab mezire kalite bourad Venezyela bannou nan efò pou nou devlope zòn la. Nou gen pou prèv reyalizasyon solid ak dirab tankou santral elektrik la ak reparasyon e agrandisman ayeropò Okap la.

N ap pwofite de dat nesans kokèn chenn gason sa a pou nou eksprime sensèman rekonesans nou a pèp venezwelyen kon direksyon politik revolisyon bolivaryen lan pou michan èd, san machanday politik ni dil, èd dirab nan tout domèn yo bay Ayiti depi 2006 jouk jodiya.

Nou pran okazyon an pou nou eksprime solidarite nou ak pèp venezwelyen nan lit lap mennen chak jou pou ranfòse peyi li anpi satisfè tout bezwen de baz popilasyon an pou l ka viv nan diyite pou anfen wete peyi Venezuela anba depandans politik, ekonomik ak kiltirèl.

Nou sezi òpotinite sa a pou nou kanpe nan vil Cap-Haïtien [Okap ?] komite solidarite ant pèp ayisyen ak venezwelyen.

Simon Bolivar – Jean Jacques Dessalines, Henri Christophe, Alexandre Pétion - Anténor Firmin – José Marti – Abizu Campos yon sèl rèv – yon sèl e menm lit

Viv solidarite Haïti-Venezuela Viv solidarite ant pèp ayisyen ak pèp venezyelyen

Pou komite a

Rony Mondestin Stanley Jean-Marie Eddy Lubin Elusca Charles Marlène Nicolas Edouard Baker Jr. Agr : Hans St Jean Nadine Mondestin Saul Gauthier Dr. Jean Paul Ricot Stephen Fanfan Wilma Innocent Ing. Allan Louis Sergilus Docteur